Comeza a singladura para levar a Milucho Louro á alcaldía e a Ana Miranda a Europa

A veciñanza acolliu onte a posta de longo do equipo do candidato que buscará revalidar a alcaldía de Carnota, Milucho Louro, e da persoa que buscará seguir sendo a valedora dos intereses galegos no Parlamento Europeo, Ana Miranda. Os dous procesos electorais votaranse simultaneamente o vindeiro 26 de maio.

Nun restaurante Doña Teresa cheo ata o límite do seu aforo, transcurriu unha Cea-presentación conducida polo actor César Cambeiro, quen dou paso primeiro a Ana Miranda, candidata do BNG ao Parlamento Europeo que xa foi todos estes anos a única persoa que trasladou os problemas do tecido social e dos sectores produtivos a Europa, como vén de facer hai só unhas semanas convidando a unha representación da pesca de baixura na que participou o propio Milucho Louro e outros representantes do sector do noso Concello. Ana é a persoa máis idónea e preparada para levar a voz do noso pobo a Bruxelas, e asi llo recoñecen mesmo os seus rivais.

Ana Miranda, candidata do BNG ao Parlamento Europeo

A continuación foron tomando a palabra un a un os 20 membros da candidatura de Milucho Louro, que coincidiron en manifestar o seu orgullo de pertencer ao mellor equipo que concurre nestas eleccións, liderado polo mellor candidato posíbel, e tamén en expresar o seu entusiasmo e confianza en que revalidar á alcaldía -e con maioría- é unha posibilidade certa. Un dos momentos máis emocionantes foi a intervención de Jesús Manuel Caamaño Caamaño, Chuchú, quen lembrou que a parroquia vive momentos tristes pola situación de Manuel de Talelo, e convidou a seguir loitando polo seu indulto, para o que o BNG logrou xa o apoio da unanimidade da corporación municipal e do Parlamento Galego. Seguiremos loitando sen descanso ata que o indulto de Manuel de Talelo sexa unha realidade.

Moncho Noceda, alcalde de Carnota

Finalmente foi Moncho Noceda, gran homenaxeado da noite, quen fixo unha intervención lembrando o duro traballo que foi necesario desenvolver para salvar in extremis ao Concello de Carnota da ruina máis absoluta en que a deixara sumida o PP, e lembrouse de todas as persoas que dun ou outro xeito lle axudaron a logralo. Moncho, que nesta ocasión pecha a lista pola súa decisión de xubilarse, pásalle o relevo a Milucho Louro coa confianza de que saberá non só continuar senón mellorar o camiño iniciado, no que o seguirá axudando cóbado con cóbado.

Milucho Louro, candidato do BNG á alcaldía de Carnota

Foi Milucho Louro o encargado, como non, de poñer a guinda a esta noite, adiantando as ideas forzas do noso Programa de Goberno 2019-2023 que lanzaremos axiña, e que se centrará na idea de facer de Carnota un lugar para vivir, dignamente, con oportunidades de traballo e servizos sociais que permitan fixar poboación e que nin un só veciño ou veciña de Carnota se volva a ver obrigado a coller as maletas e buscarse a vida fóra, a gran preocupación do seu equipo. Milucho ten claro que nese esforzo serán necesarias todas as mans e apelou a todo o inmenso potencial humano que existe no noso Concello que teñen os coñecementos e os recursos para axudar a logralo entre todas e todos.

Ao remate da intervención de Milucho estreouse en primicia un video de presentación do noso proxecto que foi moi celebrado pola asistencia, e que moi pronto estrearemos tamén nas nosas redes sociais. Tamén se presentou unha camiseta na que agardamos que toda a veciñanza se sinta representada.

Desde o BNG de Carnota queremos agradecer a todas as persoas que nos acompañaron neste evento e que nos fixeron sentirnos tan arroupados para seguir camiñando con paso sereno e firme para lograr o noso maior obxectivo, que é de poder revalidar o 26 de maio a alcaldía de Carnota e poñernos a traballar desde o mesmo día 27 para facer do noso Concello un lugar para vivir.

Candidatura do BNG de Carnota

Candidatura

1. Emilio Louro Lamela, “Milucho”
2. Belén Campos Díaz
3. Manolo Souto Barreiro
4. Pilar Tubío Lariño
5. Iván Franco Caamaño
6. Susana Riveiro Siaba
7. Nicola Lurie Mitchell
8. Jorge Fiuza Barreiro
9. Cecilia Caamaño García
10. Jesús Manuel Caamaño Caamaño, "Chuchú"
11. Ramón Noceda Caamaño

Suplentes

1. Marupe Armendáriz Villar
2. Cándido Caamaño Lado, “Marcelino”
3. Fátima Dosil Caamaño
4. Marisa Agulleiro Malvarez
5. Marcelino Saborido Lago, “Marcelo”
6. Agustín Lamela Caamaño, “Curral”
7. María Socorro González Otero
8. María Manuela Núñez Garcia
9. Iago Maceiras Dosil