O Consello Municipal da Infancia e da Adolescencia, organismo de participación xuvenil posto en marcha durante esta lexislatura para darlle voz e capacidade de decisión ao maior tesouro que ten Carnota, que é a mocidade, dou boa mostra do seu dinamismo ao organizar o pasado martes o I Foro de debate da Infancia e da Adolescencia.
Unha das actividades deste foro foi un debate cos novos candidatos á alcaldía de Carnota, para coñecelos e plantexarlles propostas e preguntas xurdidas durante o obradoiro celebrado con anterioridade. Só Milucho Louro, o novo candidato do BNG, atendeu o convite, mentras que PP e PSOE mandaron aos segundos da súa lista.
En canto ao contido do debate, Milucho salientou as oportunidades que para a mocidade brinda o Proxecto Carnota Amiga da Infancia e o I Plan Municipal de Infancia e de Adolescencia (2018 – 2021), que prevé non só o estabelecemento dun conxunto de mecanismos dinamizadores para unha participación xuvenil real e activa, e tamén que esta sexa decisiva permitindo incluso que a mocidade de Carnota poida designar unha pequena partida orzamentaria ás súas necesidades.
Neste eido, a mocidade asistente evidenciou o acerto que supón tela en conta, pois as súas inquedanzas son absolutamente sensatas, en materias como a práctica de diversos deportes (e non só o fútbol), ou a carencia de instalacións cubertas en varios lugares do municipio.
O foro rematou coa instalación da placa que acredita o recén obtido recoñecemento de Carnota coma Cidade amiga da infancia por Unicef.
Comentarios
Publicar un comentario