O BNG de Carnota xa está a redactar o que será o seu Programa de Goberno máis social e participativo, pois basearase enteiramente nas propostas recollidas durante unha intensa rolda de contactos veciñais e sociais nos que participaron preto de medio milleiro de persoas.
Sen contar a presentación de Milucho en xaneiro, o BNG desenvolviu 13 Asembleas veciñais, desde a primeira, en Lariño, pasando por Lira, Carnota, San Mamede, Caldebarcos e Panchés, A Montaña, Louredo, Canedo, Quilmas e A Curra, Pedrafigueira, Cornido, O Pindo, e Mallou. Nestas Asembleas asistiron un total de 262 persoas que nos permitiron recoller 108 propostas e iniciativas, ás que temos que sumar outras 25 propostas contabilizadas en distintos encontros con axentes sociais e culturais do municipio, coa asociación empresarial carnotá ACEP, ou recibidas a través da nosa nova App.
Éxito do encontro virtual coa 6ª parroquia, a da Carnota emigrada
Porén, o grande éxito estaría por chegar onte mesmo, na Asemblea veciñal coa nosa 6ª parroquia, e tristemente a máis numerosa: a da Carnota emigrada. A nosa diáspora secundou a oportunidade de comunicarse sen intermediarios co alcalde Moncho Noceda e co novo candidato Milucho Louro; un total de 200 persoas conectáronse en directo nalgún momento da hora que durou o encontro, o que tamén nos permitiu recoller varias preguntas, queixas e iniciativas que teremos en conta á hora de avaliar o traballo feito no goberno durante estes anos, e sobre todo durante os vindeiros 4 anos se a nosa veciñanza decide renovar a súa confianza no BNG para seguir a ocuparse do goberno de Carnota e continuar co traballo de recuperación, participación e reactivación deste Concello cheo de potencialidades e de persoas dispostas a desenvolvelas.Podedes reproducir o directo nesta ligazón.
Comentarios
Publicar un comentario