Un dos puntos tratados foi a aprobación do POS adicional 4/25. O BNG abstívose, unha vez máis, pola falta de diálogo do goberno municipal. Os 161.538,69 euros que lle corresponden a Carnota vanse utilizar integramente para gastos correntes, sen destinar nin un euro a obras, malia que no pleno anterior o alcalde recoñecera que existen moitas necesidades demandadas pola veciñanza. A preguntas do BNG sobre o destino destes cartos, o alcalde respondeu que se empregarán para pagar a débeda do lixo, que acumula xa case un ano de atraso no pago.
No pleno coñeceuse tamén outra cifra concreta vinculada á xestión municipal do verán: 4.865 euros é o importe que, segundo consta, pagou o Concello polo aluguer de terreos para aparcadoiros durante a tempada estival.
Outro dos asuntos debatidos foi a delegación de competencias do pleno ao alcalde para a investigación de bens de dominio público. Neste punto, o BNG votou en contra. Os motivos expresados foron claros: a propia alcaldía non ten claro se esta competencia corresponde ao alcalde ou ao pleno; o alcalde non responde nin aclara cal é o motivo da proposta nin que bens se queren investigar; e, tendo o PSOE maioría absoluta, o BNG pregúntase cal é o interese en asumir agora unha competencia que nunca fora pedida antes por ningún alcalde.
O punto de maior impacto económico para a veciñanza foi a modificación da ordenanza fiscal do lixo. O PSOE de Carnota aprobou en solitario unha suba das taxas do lixo, mentres que o BNG votou en contra. O BNG considera que a veciñanza vai pagar a mala xestión dos últimos anos dos alcaldes que presidiron a Mancomunidade, entre eles o de Carnota, que foi presidente durante dous anos até 2023 sen convocar nin unha soa xuntanza da mancomunidade. Segundo o BNG, non se fixo o traballo necesario nin se sacou a licitación a tempo, e por iso agora a empresa impón os custos que se lle van repercutir á veciñanza.
O BNG advertiu ademais de que se descoñecen os custos reais do servizo. Segundo se explicou no pleno, esta suba só cobre os custos existentes até 2024, e cando se coñezan os custos actuais e o reparto entre os concellos da Mancomunidade haberá que facer unha nova modificación dos prezos. Tamén se deixou constancia de que a Mancomunidade da Serra do Barbanza non pertence a Sogama. As novas taxas son provisionais e entrarán en vigor en 2026.
Na comparativa orientativa exposta no pleno, as subas afectan a distintos tipos de inmobles e actividades. Nas vivendas, a taxa pasa de 71 euros a 98 euros. En oficinas e comercios, pasa de 90 euros a 120 euros até 200 metros cadrados e 165 euros para máis de 200 metros. En talleres, almacéns, supermercados, cafés, bares e restaurantes, pasa de 120 euros a 150 euros até 200 metros, 275 euros de 201 a 500 metros e 400 euros para máis de 500. En hoteis, hostais, apartamentos turísticos e outros modelos de hospedaxe, pasa de 360 euros a 240 euros até 200 metros, 360 euros entre 201 e 500, 500 euros entre 501 e 1.000 e 680 euros para máis de 1.000. Nas oficinas bancarias, estacións de servizo e establecementos industriais e semellantes, pasa de 360 euros a 650 euros. E nas industrias con máis de 20 traballadores, pasa de 1.080 euros a 2.600 euros.
Para o BNG, este pleno volveu evidenciar unha forma de gobernar sen diálogo coa oposición e con decisións de forte impacto económico para a veciñanza. A utilización do POS para gasto corrente, a suba das taxas do lixo e a falta de claridade nalgúns expedientes son exemplos dunha xestión que require máis explicacións, máis planificación e máis respecto polo pleno como órgano de control democrático.
Comentarios
Publicar un comentario