As xornadas reuniron patróns maiores de confrarías, traballadores e traballadoras da pesca e do marisqueo, persoas expertas e representantes do BNG para analizar os principais problemas do sector na comarca e avanzar propostas de futuro.
O encontro foi presentado por Bieito Lobeira, membro da Executiva Nacional do BNG; Rosana Pérez, deputada de Mar do BNG no Parlamento galego; e Xurxo Rodríguez, responsábel comarcal do BNG Costa da Morte. Segundo a organización, participaron máis de medio cento de persoas.
O BNG destacou a dinámica positiva da xornada e sinalou que as persoas participantes pediron continuidade a este tipo de foros para seguir analizando a situación do mundo do mar e dos seus profesionais. Entre as conclusións, salientouse a necesidade de que a pesca e o marisqueo gañen representación real nos organismos onde se toman decisións.
A organización nacionalista advertiu tamén de que as confrarías e as súas federacións, especialmente estas últimas, non están trasladando a información nin exercendo unha representación adecuada, polo que considera necesario buscar fórmulas para que a xente que traballa no mar se vexa representada de verdade.
Outro dos asuntos tratados foi a desconexión entre o sector científico e o pesqueiro. O BNG sinalou que esa relación está rota por decisións políticas equivocadas e defendeu a creación de entidades comúns que permitan unha colaboración directa.
Primitivo Pedrosa, mariñeiro, presidente de artes menores da Confraría de Muros e dirixente do BNG de Carnota, participou nas xornadas e advertiu de que o interese da clase política gobernante polo medio mariño non pasa polo sector pesqueiro e marisqueiro da nosa costa. Pedrosa sinalou problemas como a lentitude nos resultados das probas, a mala adaptación das vedas, a demora na resolución de propostas do sector, o desmantelamento de servizos como o ISM e a carga burocrática.
Pedrosa tamén puxo o foco no relevo xeracional e defendeu que debería existir unha figura de aprendiz para facilitar a entrada de novas persoas no sector. Ademais, criticou o sistema de cotas de capturas, pensado para a gran industria pesqueira mais aplicado tamén á pesca artesanal, o que supón unha carga moi pesada para as embarcacións tradicionais.
As xornadas organizáronse en tres mesas de traballo. A primeira, sobre a problemática da pesca na Costa da Morte, contou con Joaquín Fábregas, patrón maior da Confraría de Fisterra; Iago Saboril, patrón de embarcación do palangre de Fisterra; e José Manuel Caamaño, patrón de embarcación de artes menores de Lira.
A segunda mesa abordou os recursos específicos na Costa da Morte e contou coa participación de Xosé Xoán Bermúdez, patrón maior da Confraría de Camelle; Jacqueline Lista, mariscadora e presidenta da Agrupación de Mariscadoras de Camariñas; Santiago Pérez, percebeiro e presidente da Asociación de Profesionais Percebe da Barca de Muxía; e Jacobo Louzán, mergullador da navalla e recolector de ourizos de Fisterra.
A terceira mesa centrouse nas propostas e conclusións, coa participación de Francisco Javier Varela Castro, secretario da Confraría de Malpica; Pablo Pita, científico do CICA da Universidade da Coruña; Primitivo Pedrosa, presidente de artes menores da Confraría de Muros; e Javier García Galdo, biólogo mariño e director técnico nunha empresa do sector.
O BNG considera necesario dar continuidade a este traballo para que o mar da Costa da Morte teña políticas pensadas desde a realidade do sector e non desde despachos alleos á vida das confrarías, dos portos e da xente que vive do mar.
Comentarios
Publicar un comentario