No pleno municipal do día 2 de agosto de 2024, o goberno local levou a aprobación dos orzamentos municipais de 2024, que saíron adiante só cos votos do PSOE.
O BNG votou en contra pola falta de diálogo do goberno municipal e despois de seren rexeitadas as alegacións presentadas polo noso grupo. Uns orzamentos municipais deben ser unha ferramenta útil para planificar o funcionamento do Concello, atender as necesidades reais da veciñanza e marcar prioridades claras. Mais, neste caso, o BNG considera que as contas aprobadas non responden á realidade económica e social de Carnota.
Os orzamentos non reflicten a realidade do Concello. En particular, os ingresos previstos non se corresponden cos ingresos reais municipais, o que pode afectar á capacidade de execución e á fiabilidade das contas. Para o BNG, aprobar uns orzamentos sen unha previsión realista dos ingresos é un problema serio de planificación e de responsabilidade política.
A falta de diálogo tamén marcou a tramitación. As alegacións do BNG foron rexeitadas, impedindo incorporar propostas e correccións que poderían mellorar o documento. O goberno municipal optou por aprobar as contas facendo uso da súa maioría, sen procurar acordos nin atender as achegas da oposición.
No mesmo pleno tratouse tamén a modificación do POS 2024, coa desaparición das actuacións de saneamento previstas para Parada e O Pindo e cun incremento importante dos fondos destinados a gasto corrente. Outro dos asuntos abordados foi a situación do servizo de socorrismo nas praias de Carnota. O BNG considerou insuficientes as tres prazas convocadas, denunciou que non se convocase a praza de auxiliar de socorrista e advertiu de que, outro ano máis, a lancha permanecía fóra de servizo.
Para o BNG de Carnota, este pleno volveu evidenciar unha forma de gobernar baseada na maioría numérica, mais sen suficiente diálogo, sen planificación compartida e sen atender debidamente as propostas da oposición. Carnota precisa uns orzamentos realistas, unha planificación clara das obras e servizos públicos ben dimensionados para responder ás necesidades da veciñanza.
O BNG seguirá exercendo o seu labor de control, presentando propostas e defendendo unha xestión municipal máis transparente, dialogada e responsábel.
Comentarios
Publicar un comentario