Somos galegos e o noso idioma propio e orixinal é o galego. Igual que calquera pobo do mundo, nós tamén temos o dereito inalienábel a que a nosa lingua sexa de uso normal en Galiza.
Por razóns históricas, e mediante diferentes mecanismos de imposición, o castelán é un idioma introducido desde hai séculos na sociedade galega, mais non debemos esquecer que o galego é o idioma natural de Galiza e que non estaría nun proceso de retroceso e de perda de falantes se non fose pola situación de anormalidade, dependencia e subordinación a respecto do castelán que é o idioma do poder dominante. Por iso, non só é lexítimo, senón tamén necesario, que o pobo galego aspire a que a súa lingua volva a unha situación normal para ser usada por todos os galegos e galegas sen dificultades nin discriminacións, igual que calquera idioma normal do resto do mundo.
Hoxe a situación dista moito diso. É xustamente o idioma propio e natural de Galiza, o galego, o que atopa serios atrancos para o seu uso en diferentes ámbitos que son transcendentais para a supervivencia dun idioma: os medios de comunicación, a vida económica e empresarial, a xustiza, o ensino, as tecnoloxías da información e comunicación, etc, etc. Contrariamente, é imposíbel en Galiza non coñecer o castelán, idioma no que unha persoa pode desenvolver toda a súa vida sen dificultades. Non é este idioma o que está en perigo pois está sustentado por poderes moito maiores que o galego.
Apesares desta evidencia, hai sectores que organizadamente atacan a tímida política lingüística oficial. Cinicamente din defender o bilingüismo e a igualdade entre os dous idiomas, mais para iso o que terían é que promover o uso do idioma en clara desvantaxe: o galego. O que verdadeiramente perseguen é que o noso idioma siga a perder falantes sen que os poderes públicos tomen ningún tipo de medidas e sen que os galegos tomemos conciencia desta situación.
Desde o BNG, nestes momentos que se tenta crear confusión a respecto da situación real do noso idioma, queremos animar a todos os galegos e galegas a usalo a cotío e contribuír á súa recuperación. No seo da familia, no traballo, nas relacións con toda a Administración, no tempo de lecer, o galego debe aparecer, fortalecerse e impulsarse.
A normalización do galego na sociedade galega é un obxectivo vital, que non pon en perigo a existencia nin o coñecemento, nin tampouco os usos individuais doutros idiomas, e en concreto do castelán.
Os poderes públicos e a sociedade galega deben preocuparse por quen o necesita: o galego.
É por iso que o BNG quere facer un chamamento a todo pobo galego a participar na manifestación que convoca a para o día 18 de maio, como xeito de defender os dereitos ao uso da lingua propia e mostrar o firme compromiso de garantirlle un futuro digno.
MANIFESTACIÓN o día 18 de maio ás 12 na Alameda de Santiago. O BNG de Carnota estará alí defendendo o noso idioma, e esperamos verte a ti tamén.
Máis información:
Corren malos tempos. Cando temos que reivindicar o que somos e que corren malos tempos.
ResponderEliminarCando temos que pelexar por o noso patrimonio e que corren malos tempos.
Ninguén pon en dubida que se debe conservar o patrimonio, como a Torre de Hércules ou a Catedral de Santiago.
Pois un dos nosos patrimonios fundamentais, a nosa lingua so se protexe de unha forma, falando.