A propia Xunta admitiu que a maior parte do trazado discorre por camiños consolidados, zonas urbanas ou infraestruturas xa existentes. É dicir, non estamos diante dun proxecto novo, senón dun simple rebranding institucional dos camiños das parroquias, os accesos ao mar, as sendas tradicionais e os espazos que a veciñanza e os concellos levamos décadas mantendo, usando e defendendo a custa dos fondos propios.
O BNG considera positivo calquera proxecto que axude a coñecer e valorizar o litoral, mais lembra que os seus camiños precisan de investimentos reais en mantemento, limpeza, seguridade, accesibilidade e protección ambiental, non anuncios baleiros lanzados de costas á súa poboación e entidades locais. O noso litoral non é un decorado para a foto. É territorio vivo, motor de memoria colectiva e futuro para Carnota, e merece respecto.
O noso Concello conta cun medio litoral e patrimonio mariñeiro inmenso e privilexiado que custa moito manter, e para iso necesitamos compromisos reais a través de investimentos, que cando menos en Carnota brillan pola súa ausencia desde que o PP ocupa a Xunta (non asi co anterior goberno, que por exemplo restaurou as casetas de Caldebarcos). Por isto é particularmente sangrante e cínico este exercicio de turismo político do máximo representante do executivo do PP na Xunta, Alfonso Rueda, mais tamén que o noso alcalde Juan M. Saborido se prestara a este paripé sen que conste ter posto ningún tipo de crítica ou reparo. Xa ten demostrado noutras ocasións o que lle importa o noso patrimonio mariñeiro.
En todo caso lembrrámoslle ao rexedor que este señor co que posa nas fotos é o mesmo que recurta a nosa sanidade, educación e demais servizos públicos; de nada serve sacala foto nas mobilizacións contra esas políticas se logo corremos a sacarnos a foto co máximo responsábel das mesmas, e de paso validalo.
Outra oportunidade perdida para facernos respectar.
Esta é a visión do deputado nacionalista e habitual no noso Concello, Luis Bará:
Vexamos o bluff do Camiño do Litoral
Esta proposta xa estaba incluida no Plan de Ordenación do Litoral de 2011 como "Senda dos Faros" e non chegou a desenvolverse como estaba previsto mediante un plan ou plans especiais no prazo de 2 anos (2013).
Na lei de 2023 de xestión integrada do litoral prevese no artigo 56 "a rede de sendas litorais", que se subordina ao Plan de ordenación costeira, plan que establecerá en colaboración cos concellos litorais a rede de sendas litorais baixo os seguintes criterios (...). A realidade é que o plan de ordenación costeira substituto do POL non está aprobado (tiña que estalo en xullo de 2023). A Xunta dá exemplo incumprindo o que prevé a lei.
Tal como desvelou o xornal Praza, o Camiño do Litoral é un invento. Segundo a propia Xunta "o 90% non precisa actuacións significativas porque xa coincide con rutas xa consolidadas". Realmente o Camiño do Litoral é un corta e pega de treitos de sendas xa existentes, e alí onde non hai continuidade discorre por trazado de estradas, algunhas delas con moito tráficoe o conseguinte risco.
Nalgunhas zonas existe xa algo parecido ao Camiño do Litoral, a Rede de Cicloturismo Eurovelo 1 da Costa Atlántica que discorre entre Tui e Fisterra ao longo de máis de 500 km (sen moito éxito de momento, por certo).
Pódese ver a proposta de trazado do Camiño no visor
Noutra publicación ampliaremos esta análise con referencia aos defectos legais na tramitación do Camiño do litoral, a falta de avaliación do posíbel impacto desta infraestrutura en áreas protexidas e o plan de fondo que hai detrás de explotación intensiva do litoral (non é casual que a presentación de onte se fixese ao lado do negocio dun empresario amigote de Rueda que aparece na foto xunto cos cargos institucionais).
Comentarios
Publicar un comentario