O BNG reclama obras urxentes no firme da AG-55 entre Carballo e A Coruña

O BNG exixiu á Xunta de Galiza obras urxentes de mellora no firme da autovía AG-55 entre Carballo e A Coruña, unha vía utilizada habitualmente pola veciñanza da Costa da Morte nos seus desprazamentos cara á área coruñesa.

O deputado Oscar Insua denunciou o mal estado do firme, con “ducias de balsas de augas e de fochancas” ao longo do traxecto, e advertiu de que nos días de choiva a circulación convértese nun perigo. “Pagar por isto é un atraco, outra aldraxe á nosa comarca”, sinalou.

O BNG lembra que a AG-55 entre A Coruña e Carballo foi construída nos anos noventa e que, case tres décadas despois, presenta un estado lamentábel, con rebacheos, acumulacións de auga e puntos nos que se produce aquaplaning.

A organización reclama que a Axencia Galega de Infraestruturas realice unha inspección global da autovía e determine as actuacións necesarias para solucionar os problemas de seguridade viaria. Para o BNG, non é aceptábel que unha vía de peaxe presente este estado de conservación.

Oscar Insua advertiu de que a concesión da AG-55 remata en 2045 e reclamou medidas urxentes: mellorar o firme, garantir a seguridade e eliminar a peaxe mentres o servizo non se preste en condicións axeitadas.