A entrada en vigor do novo regulamento provocou unha forte resposta do sector, con paros e mobilizacións en distintos puntos, tamén na Costa da Morte. Para o BNG, a norma introduce unha carga burocrática e unhas obrigas difíciles de asumir para embarcacións pequenas, con tripulacións reducidas e cunha realidade moi distinta á da grande frota industrial.
A deputada e voceira de Mar do BNG, Rosana Pérez, reclamou “realismo e sentido común” á hora de regular estas embarcacións. A partir de 2030, as obrigas estenderanse tamén aos barcos de menos de 9 metros, precisamente unha parte moi importante da frota artesanal e de baixura galega.
“Este non é un regulamento nin para a nosa frota artesanal nin para as nosas rías. Está pensado para outro tipo de barcos máis grandes e non recoñece a realidade do noso sector”, advertiu Rosana Pérez, lembrando que tanto PP como PSOE apoiaron esta normativa e deben agora asumir a súa rectificación.
Entre os problemas sinalados está o diario electrónico, considerado inasumíbel para moitas embarcacións de baixura, así como a obriga de realizar múltiples comunicacións ao longo da xornada, engadindo máis burocracia a un sector xa sometido a fortes esixencias administrativas.
Para concellos mariñeiros coma o noso, con actividade pesqueira tradicional e forte vínculo co mar, esta cuestión ten unha importancia directa. Defender a frota artesanal é defender emprego, territorio, relevo xeracional e unha forma de vida ligada ás comunidades costeiras.
Comentarios
Publicar un comentario