Moción para reclamar o remate da AG-55 e a eliminación das peaxes

O Concello de Carnota foi un dos sete concellos da Costa da Morte nos que se aprobaron mocións presentadas polo BNG para reclamar á Xunta de Galiza que remate a Autovía da Costa da Morte, AG-55, e elimine as peaxes.

As mocións foron aprobadas en Camariñas, Carnota, Cee, Corcubión, Dumbría, Fisterra e Muxía, e reclaman que a Xunta continúe coa execución da ampliación da autovía da Costa da Morte.

A proposta demanda licitar xa o tramo Salto-Berdoias da AG-55 e executalo conforme o proxecto inicial, con dous carrís para cada sentido. Tamén reclama incorporar nos orzamentos da Xunta para 2025 a contía suficiente para executar os tramos Berdoias-Cee, Cee-Porto de Brens e a conexión da autovía co polígono de Vimianzo.

A moción inclúe tamén unha reivindicación central para a veciñanza da Costa da Morte: a supresión de todas as peaxes para que a autovía sexa gratuíta en todos os seus tramos.

O deputado do BNG Oscar Insua denunciou que “o PP segue enganando á veciñanza da Costa da Morte, porque nas eleccións prometeron que a farían e neste ano non executan o orzamento que tiñan previsto, o mesmo que ocorreu nos últimos seis anos”.

Pola súa banda, o responsábel comarcal do BNG, Xurxo Rodríguez, afirmou que “o PP segue a ningunear á comarca e a mantela como un escaparate turístico, deixando de lado o noso desenvolvemento económico e social”. Rodríguez sinalou que a ampliación da AG-55 “é algo vital para as empresas, para ser competitivos e para fixar poboación, xa que somos a rexión de Galiza que máis habitantes perde”, e engadiu que tamén é fundamental a eliminación das peaxes.

Para o BNG de Carnota, esta é unha reivindicación comarcal de primeira orde. A mobilidade condiciona o acceso ao traballo, aos estudos, aos servizos sanitarios e á actividade económica. A Costa da Morte non pode seguir acumulando atrasos, promesas incumpridas e discriminación territorial.