O BNG pide o reforzo de servizos médicos e novas especialidades no hospital público da Costa da Morte

O BNG reclamou á Xunta de Galiza o reforzo de varios servizos médicos e a creación de novas especialidades no Hospital Público Comarcal Virxe da Xunqueira, en Cee.

O deputado Oscar Insua presentou iniciativas no Parlamento galego para demandar máis medios nun hospital que atende a veciñanza da Costa da Morte e que continúa sen contar con servizos suficientes para garantir unha atención en igualdade de condicións co resto de Galiza.

Entre as medidas reclamadas polo BNG está a creación dunha nova praza de psiquiatría para reducir as listas de agarda e mellorar a atención ás persoas usuarias. Tamén se demanda a recuperación do servizo de hospitalización a domicilio, HADO, dotándoo do persoal necesario para que funcionen as dúas unidades existentes hai un ano.

O BNG reclama ademais un verdadeiro servizo de cardioloxía, coas prazas necesarias para que funcione as 24 horas do día e os 365 días do ano; unha quenda máis de diálise; e a ampliación do servizo de REA, sala de reanimación, á quenda da noite.

A organización nacionalista tamén considera imprescindíbel incorporar novas especialidades como neuroloxía, logopedia e terapia ocupacional. Segundo o BNG, só se pode acceder actualmente a algunhas destas prestacións desde o sector privado, polo que é necesario ofrecelas desde a sanidade pública.

Oscar Insua resumiu a demanda cunha idea clara: ampliar servizos é ampliar dereitos. A Costa da Morte precisa un hospital de primeira, non un centro limitado por falta de persoal, especialidades e vontade política.