Crónica do pleno do 13/12/24: O BNG leva ao pleno a preocupación pola corta forestal, o CEIP de Carnota e a Casa do Mar de Lira

O BNG de Carnota levou ao pleno municipal do 13 de decembro a súa preocupación por diferentes asuntos que afectan directamente á veciñanza e ao interese xeral do concello: a corta indiscriminada de grandes masas forestais, a situación do CEIP de Carnota e os termos do convenio de cesión da Casa do Mar de Lira.

En primeiro lugar, o BNG amosou a súa preocupación polas queixas, a falta de información e as denuncias presentadas por parte da veciñanza en relación coa corta de grandes masas forestais en terreos privados, que se estaría realizando coa autorización do Concello mais sen seguir os trámites correspondentes.

Para o BNG, calquera actuación deste tipo debe facerse con todas as garantías legais, ambientais e administrativas. A xestión do territorio non pode depender da improvisación nin da falta de transparencia. Cando existen queixas veciñais e denuncias, o Concello ten a obriga de informar, comprobar os feitos e garantir que se cumpren os procedementos estabelecidos.

No mesmo pleno aprobouse por unanimidade unha moción de urxencia na que a ANPA apoia o informe do CEIP de Carnota, onde se solicitan as reformas necesarias para o mellor funcionamento do centro. O BNG xa presentara, dentro do prazo, unha emenda aos orzamentos da Xunta de Galiza para reclamar a reforma integral do edificio, incluída a mellora enerxética, os patios e o entorno do colexio, por un valor dun millón de euros.

O ensino público de Carnota precisa investimentos reais. Non abonda con parches nin con pequenas actuacións illadas cando existen necesidades estruturais que afectan ao funcionamento diario do centro e á calidade educativa das crianzas.

Outro dos puntos tratados foi o convenio de cesión da Casa do Mar de Lira. O BNG abstívose nos termos do convenio asinado polo Concello porque o goberno municipal non presentou un informe técnico sobre o estado do inmoble nin un informe económico de previsión de gasto, tanto no relativo ao investimento necesario para o acondicionamento como aos custos fixos que terá que asumir o Concello.

Ademais, o BNG advertiu de que unha concesión de só vinte anos resulta escasa para compensar a posíbel inversión que será preciso realizar nun edificio destas características. A Casa do Mar de Lira pode ser unha oportunidade para a parroquia e para o conxunto do concello, mais precisamente por iso cómpre actuar con rigor, planificación e garantías.

Desde o BNG de Carnota seguiremos defendendo que os asuntos importantes se traten con información completa, participación e responsabilidade. O territorio, os centros públicos e o patrimonio municipal non poden xestionarse ás cegas nin sen coñecer previamente os seus custos, condicións e consecuencias.

Carnota precisa un Concello transparente, que escoite á veciñanza e que actúe con planificación.