Oscar Insua, xunto a Primitivo Pedrosa, membro do Consello Local do BNG Carnota, reuníronse con representantes da ANPA do colexio de Carnota para coñecer de primeira man a problemática. A asociación de pais e nais do alumnado vén denunciando a situación penosa na que se atopa o centro, que precisa de reformas estruturais que debe resolver o goberno galego, e dirixiuse por carta ao conselleiro de Educación en decembro de 2024 dándolle traslado dun informe elaborado polo propio centro no que se recollen as necesidades máis urxentes.
O BNG subliñou que en dito estudo relátase que o sistema de calefacción non funciona correctamente, ao que se suma unhas fiestras antigas de aluminio de cristal simple. “A vista disto, é necesario afrontar reformas de illamento e de eficiencia enerxética, como primeira medida urxente e que non pode demorarse máis”, destacaron os nacionalistas, que ademais afondaron en que son moitas máis as reformas necesarias, “que son estruturais e que precisan unha actuación por parte de Educación, como pode ser a do tellado do centro de ensino, as filtracións e humidades no ximnasio, ou o afundimento do piso nalgunhas aulas e corredores”.
Pola súa banda, Primitivo Pedrosa manifestou que “o desleixo do goberno galego neste tema amosa unha vez máis a marxinación que sufrimos no rural, que provoca despoboamento pola falta duns servizos dignos”. Pedrosa subliñou que seguirán loitando “para que Educación acometa as reformas necesarias e as crianzas teñan un centro de ensino en boas condicións”.
“Desde o BNG sempre apoiamos as reivindicacións das familias, que vén como a Xunta leva moitos anos de inacción sen reformar o colexio de Carnota; os que agora son avós do alumnado que estuda no CEIP Plurilingüe, recibiron hai moitos anos clases nun centro de ensino novo, que na actualidade está en situación lamentable e con múltiples deficiencias estruturais”, sinalou.
Comentarios
Publicar un comentario