Crónica do pleno do 2 de febreiro de 2024

No pleno ordinario do Concello de Carnota celebrado o día 2 de febreiro de 2024 aprobáronse varios asuntos de interese municipal, entre eles o Plan de Obras da Deputación e unha moción presentada polo BNG sobre o estado das instalacións e o funcionamento da planta de tratamento de residuos da Mancomunidade Serra do Barbanza.

O BNG apoiou a aprobación do POS

O pleno aprobou por unanimidade o Plan de Obras da Deputación, POS 2024.

O acordo inclúe diferentes actuacións repartidas polo concello, tanto dentro do POS ordinario como no plan adicional, este último dependente da existencia de fondos da Deputación e dunha nova aprobación.

Dentro das obras do POS figuran as seguintes actuacións:

• Lira: saneamento, cun investimento de 113.053,10 euros.
• Lariño: recollida de augas, cun investimento de 65.513,41 euros.
• O Viso: aseos públicos, cun investimento de 31.533,81 euros.
• Gastos correntes: 115.000 euros.

No plan adicional inclúense tamén as seguintes actuacións:

• Parada: saneamento, cun investimento de 115.609,57 euros.
• Quilmas: reparación de pista, cun investimento de 44.360,99 euros.
• O Pindo: saneamento, cun investimento de 40.073,97 euros.

Ademais, o Plan da Deputación contempla 51.575,30 euros para gastos sociais extraordinarios.

Desde o BNG votamos a favor deste plan por entender que recolle actuacións necesarias para diferentes lugares do concello e permite avanzar en servizos básicos como o saneamento, a recollida de augas, a mellora de infraestruturas e o reforzo dos gastos sociais.

O seguimento da execución destas actuacións será fundamental para garantir que os investimentos aprobados se materialicen en tempo e forma e respondan ás necesidades reais da veciñanza.

Apoio á Mancomunidade Serra do Barbanza

Tamén se aprobou por unanimidade a moción do BNG relativa á planta da Mancomunidade Serra do Barbanza, unha infraestrutura esencial para a xestión do lixo dos concellos participantes e cuxo funcionamento debe ser obxecto de seguimento e control público.

O BNG abandou o pleno en protesta polas faltas de respecto

Porén, o pleno tamén estivo marcado polas reiteradas faltas de respecto á oposición. Ante esa situación, o BNG abandonou a sesión como mostra de protesta. Aos plenos vaise a resolver os problemas da veciñanza, a debater con respecto e a render contas da xestión municipal. Sen respecto institucional non se constrúe un Concello democrático nin útil para Carnota.

Desde o BNG seguiremos defendendo a transparencia, o control político e o respecto á representación democrática da veciñanza.