O pleno aproba a moción do BNG por unha vida digna na Costa da Morte

O pleno do Concello de Carnota aprobou por unanimidade unha moción presentada polo BNG para reclamar medidas que garantan unha vida digna e sen desigualdades na Costa da Morte.

A iniciativa recolle demandas fundamentais para o futuro da comarca. Entre elas, o remate da autovía da Costa da Morte e a súa conexión co Porto de Brens e co Polígono Industrial de Vimianzo, tal e como estaba previsto inicialmente. Para o BNG, mellorar as comunicacións é imprescindíbel para favorecer a actividade económica, facilitar os desprazamentos diarios e rematar co illamento que padecen moitos concellos da comarca.

A moción tamén reclama a eliminación das peaxes da autovía Carballo-A Coruña. A veciñanza da Costa da Morte non pode seguir pagando unha penalización económica por desprazarse a traballar, estudar, recibir atención sanitaria ou acceder a servizos básicos.

Outro dos puntos aprobados demanda un verdadeiro plan de transporte público para a comarca, cunha nova planificación das conexións, mellores rutas, tempos máis razoábeis e ampliación das paradas aos núcleos rurais. O rural non pode quedar desconectado nin depender dun transporte insuficiente.

A proposta tamén insta a Xunta de Galiza a iniciar estudos de viabilidade para un servizo ferroviario de proximidade na Costa da Morte e a impulsar a mellora das telecomunicacións, acelerando a chegada da fibra óptica a todo o territorio.

Desde o BNG de Carnota defendemos que vivir na Costa da Morte non pode significar ter menos dereitos, menos servizos e menos oportunidades. Esta moción é unha proposta para avanzar en igualdade territorial e para reclamar investimentos reais nunha comarca que leva demasiado tempo agardando.