Triste adeus á caseta de Miché, no entorno do Faro de Lariño

No día de onte os veciños de Lariño puideron asistir con asombro como a “Caseta de Miché” era derrubada por Costas coincidindo coas melloras da pasarela de acceso á praia, dentro do plan que a Demarcación de Costas de Galicia está facendo ao longo da Costa galega de reparación das pasarelas existentes.

Varios veciños e veciñas contactaron connosco para solicitar información ao respecto, e en base á información que puidemos recabar, temos a ben trasladala a toda a veciñanza por esta vía para o seu coñecemento:

Xa fai anos era intención de Costas proceder ao derrubo da caseta e así llo ten trasladado a Moncho Noceda durante a última etapa de goberno do BNG, xa que pedían que o Concello iniciara o pertinente expediente de expropiación, mais o anterior alcalde negouse rotundamente.

Con motivo do Pleno celebrado onte, xoves 27 de maio, o grupo municipal do BNG formulou unha pregunta ao Sr. Alcalde Juan Manuel Saborido sobre se era coñecedor desta actuación por parte de Costas, ao que a resposta foi un taxante "non", e manifestou estar moi sorprendido xa que as cousas non deberían de facerse así, pero que entendía que é un asunto que ten que resolverse entre Costas e a propietaria da caseta. Acto seguido a Tenente Alcalde e veciña de Lariño, Merche Noceda, reafirmouse no dito polo alcalde e tamén manifestou que vista a situación de abandono da caseta que non aportaba nada, estaba chea de lixo e que era un claro exemplo de feismo.

Dúas horas despois do pleno, no Facebook do PSOE Carnota saen ao paso do malestar xerado entre a veciñanza para reiterar a súa sorpresa e que non tiñan constancia das intencións de Costas pero ao ser coñecedores da triste nova contactan coa Demarcación e infórmanlles de que hai un expediente aberto. No transcurso do pleno esa información non se lle trasladou aos membros da oposición, diante da pregunta formulada polo grupo municipal do BNG, polo tanto MINTEN.

Xa no día de hoxe, nunha entrevista en Radio Nordés, o Sr Alcalde manifestou que a principio da lexislatura, hai un par de anos, que “esa ruina” estaba afectada por un expediente de demolición pero non lle mostraron máis interese porque entendía que era un asunto que tiña que resolverse entre a Demarcación de Costas e a propietaria. Ou sexa, volve a recoñecer que si tiña información pero que nada fixeron por arranxalo, polo tanto MINTE diante de todos os membros da corporación asistentes ao pleno.

Non deixa de sorprendernos que a obra de mellora da pasarela de acceso á praia sexa vendida como unha “xestión” do goberno municipal e así o plasman nas redes sociais “a bombo e platillo” desde o PSOE Carnota e compartido por Merche Noceda con amplia documentación fotográfica das obras de arranxo da pasarela, pero o que si se bota en falta é a triste foto dos cascotes do que foi a Caseta de Miché, derrubada polos mesmos operarios e pola mesma pala.

O que si temos claro é a intención de Costas, trasladada por Rafael Eimil, Xefe da Demarcación, ao anterior alcalde Moncho Noceda, de iniciar proceso de expropiación para o derrubo, ao cal este se opuxo frontalmente. A vista do acontecido semella que agora si se atoparon coas circunstancias propicias e o “momento oportuno” para facelo, mentras tanto un expediente aberto no mesmo entorno do faro e neste caso claramente identificado tamén desde fai anos, está pendiente de executarse. Semella que aínda hai diferencia entre ricos e pobres.

Agardamos que esta sexa a última afronta ao noso patrimonio pesqueiro coa pasividade e permisividade do actual goberno municipal, xa que na mesma situación atópanse unha longa lista de casetas de mariñeiros ao longo de todo concello.