O PSOE bloquea o proxecto que xestionara o BNG para o entorno do Faro de Lariño, e empeora moitos outros

Á dereita, o espazo que vai ser enteiramente restaurado e integrado no entorno do Faro, cando o PSOE o permita

O BNG de Carnota denuncia a demora absolutamente inxustificada do proxecto xestionado polo anterior goberno local para recuperar medioambientalmente e poñer en valor o Faro de Lariño, que xa debería ser unha realidade despois de décadas de abandono dun espazo paisaxístico privilexiado.

O proxecto tramitado polo anterior executivo de Moncho Noceda contempla a demolición das barreiras visuais do antigo campo de fútbol, que leva décadas en desuso, para dar paso a un proxecto de reintegración paisaxística deste espazo no seu privilexiado entorno natural de Punta Insua, dotándoo de instalacións deportivas, lecer e delimitando ademais un espazo para dar solución a unha vella demanda: unha zona para o estacionamento de autocaravanas. As obras estaban a piques de iniciarse, mais o cambio de goberno que se produciu en Carnota en maio do ano pasado, cando o goberno pasou do BNG ao PSOE, truncouno de raíz.

É importante recalcar que este proxecto foi aprobado por unanimidade do Pleno (BNG, PP e PSOE), que foi consensuado coa veciñanza de Lariño en asambleas veciñais e que ata se deixou xa aprobada a partida orzamentaria, polo que BNG de Carnota esixe ao goberno local que deixe de demorar esta iniciativa e permita que arranquen dunha vez as obras, para que se salde dunha vez a débeda histórica que ten o Concello de Carnota co pobo de Lariño, que leva décadas sen poder sentirse orgulloso dun dos seus máis fermosos e virxes espazos naturais.

Pola parte positiva, onte mesmo o Consello de Ministros levantou a prohibición para usar o faro de Lariño como aloxamento turístico, dando por fin a razón á prolongada loita da veciñanza de Lariño, que lanzaran a campaña Salvemos o Faro pola posta en valor do seu principal símbolo de xeito que se convirta nun motor para o entorno. O noso parabén a todas as persoas que contribuíron a esta vitoria.

Non fan, e paralizan ou empeoran o que fixemos outros antes

O PSOE apela ao «aforro», pero non o demostra, para xustificar o cambio arbitrario de calidades e de materiais

Non é a primeira vez que o novo goberno local paraliza ou mesmo empeora cos seus cambios arbitrarios un proxecto xa deseñado, financiado e aprobado polo executivo anterior, como acaba de pasar co proxecto da Rúa de Lira, no que substituíron a pedra orixinal por outra moitísimo menos integrada no entorno e nin sequera renovaron o firme antigo, tal e como estaba no proxecto.

O mesmo acontece cos proxectos de renovación das vías de Mallou e na Capela do Pindo, onde o PSOE tamén fixo cambios con respecto aos proxectos orixinais do gobrno anterior aprobados por unanimidade no Pleno e consensuados no seu día co pobo, e que non agradaron para nada á veciñanza.

En todos os casos o PSOE apela ao suposto «aforro» que lle supón cambiar os materiais orixinais a outros máis cativeiros, mais o BNG dubida que sexa asi e mesmo sospeita que nalgúns casos en realidade a modificación acabou encarecendo o proxecto.

Un goberno inimigo da natureza?

Aspecto de devastación que presenta hoxe o espazo verde a carón do Colexio de Carnota

O executivo local arrasou a arboreda que protexía e abrigaba o espazo verde de titularidade municipal entre o Colexio Público e o Centro Médico de Carnota, quen fora obxecto dunha actuación de posta en valor polo anterior executivo local. Con estas palabras o conta o profesor xubilado Manolo Souto: «Hoxe fun ao concello e contemplei un panorama desolador. As árbores prantadas polos meus alumnos e alumnas fai quince anos aproximadamente foron aniquiladas polas mans de xentes sen sensibilidade algunha. Que mágoa!».