O PSOE pacta os salarios co PP

Goberno municipal (fonte: La Voz de Galicia)

Finalmente confírmase a existencia dun pacto do PSOE co PP de Carnota; o acordo, anticipado na prensa e confirmado no pleno de hoxe, garante un salario de 35.000€ para o alcalde e de 14.500 para a tenente de alcalde, importes algo inferiores ás súas pretensións iniciais pero aínda superiores, en calquera caso, dos límites fixados no plano de axuste vixente ata 2023 que no seu día fora aprobado pola corporación municipal co apoio do propio PSOE. Asi mesmo, tamén aprobaron elevar as asistencias a plenos e xuntas de goberno.

A veciñanza descoñece aínda a día de hoxe con que programa goberna o PSOE, por iso non parece moi lóxico que comecen esixindo un incremento repentino dos salarios políticos, o que é unha falta de respecto a toda a veciñanza e demostra a nula vontade de diálogo por parte dun alcalde que unha e outra vez minte na prensa para construír o relato que máis lle convén, mesmo facéndose o sorprendido ante a nosa postura de un salario digno para o alcalde dun pobo digno, cando a mantivemos durante os 8 anos de goberno de Moncho Noceda e seguímolo facendo agora, como ben sabe toda a veciñanza e de feito ofrecémosllo en reiteradas ocasións ao propio Moma, quen nunca foi quen de xustificar, nin no Pleno nin ante a veciñanza, a súa pretensión de elevar o salario do alcalde de golpe dez mil euros, un 33% máis, ata alcanzas o tope legal.

Tampouco sabemos cal será o custo para os carnotáns deste pacto co PP, que sempre deixou claro que o seu apoio non sairía gratis. Sen embargo chama a atención que este apoio coincide coa asunción polo goberno dunha obra de saneamento no Campo de Sofán (Lira) que beneficia directamente a un veciño do lugar moi vinculado co PP, cando no mesmo lugar hai necesidades moitisimo máis apremiantes coma dotar de saneamento o Pazo, moito máis habitado; ademais, esta actuación que non debera superar os dez mil euros está orzamentada en 54.000, sobrecuste que desde logo podería ter, en opinión do BNG, un destino moito máis produtivo para o conxunto da veciñanza.

Non houbo negociación algunha co BNG

Como mostra de transparencia coa nosa veciñanza o BNG quere aclarar que xamais participamos nunha verdadeira negociación co PSOE; de feito desde as eleccións ata o pleno de organización só houbo unha chamada telefónica, na que o noso responsábel local lle pediu ao Moma que lle trasladase unha proposta para poder valorala na Asemblea Local do BNG, o que nunca fixo. Só cando o Pleno tumbou a súa disparatada proposta salarial, que rexeita a inmensa maioría da veciñanza, convocounos a unha reunión. Para a nosa sorpresa o alcalde presentouse nela en solitario, e non por casualidade: a súa nova proposta era apoiar o seu soldo de 41.000 euros e deixar sen soldo a Merche Noceda; a cambio de aceptar, o BNG podería entrar máis adiante ao goberno. Obviamente rexeitamos esta proposta, e aí rematou o interese do alcalde en falar co BNG, centrándose desde entón en falar exclusivamente co PP. Lamentamos a falta de transparencia e que o novo goberno de Carnota leve estragados dous meses de mandato unicamente en aumentar os seus salarios políticos.

Cronoloxía

Subliñamos en amarelo os únicos contactos que mantivo o PSOE co BNG desde o día das eleccións. As supostas negociacións co BNG ás que fai constantemente referencia o PSOE na prensa son mentira, non existen.

• 26/05. Eleccións Municipais. O PSOE é a forza máis votada, e o BNG asume o seu papel na oposición.
• 04/06. O PSOE anuncia na prensa que o PSOE asume que gobernará en minoría.
• 11/06. O PSOE anuncia agora na prensa que buscará pactos coas outras forzas.
• 11/06. Juan M. Saborido (PSOE) realiza unha chamada telefónica ao noso responsábel local, Iván Franco; este foi o único contacto co BNG antes do pleno de investidura.
• 14/06. O BNG anuncia que ante a falta de diálogo polo PSOE apoiará a súa propia candidata.
• 15/06. Pleno de investidura. Tal e como estaba previsto cada forza política apoia a súa propia candidatura, o que converte a Juan M. Saborido en alcalde de Carnota.
• 19/06. O PSOE anuncia na prensa que "arroxa a toalla" e que gobernará en solitario.
• 27/06. O PSOE convoca o pleno de organización fóra de prazo, e comunica ás forzas unha proposta salarial disparatada que provoca o inmediato rexeitamento veciñal e do BNG, que lle oferta un soldo coma o de Moncho.
• 29/06. O PSOE desconvoca o pleno, tras advertirlle o BNG de que fora mal convocado, e volve a convocalo para o 04/07.
• 01/07. O debate social evidencia que a inmensa maioría da veciñanza rexeita a proposta salarial do PSOE. O BNG reitera a súa oferta dun salario para o alcalde coma o de Moncho.
• 04/07. Pleno municipal de organización. A corporación tumba a proposta salarial do PSOE.
• 06/07. O PSOE anuncia na prensa que revisará as súas propostas despois do rexeitamento polo pleno.
• 10/07. O PSOE anuncia na prensa que se non acada un acordo coa oposición o alcalde volverá ao seu posto de traballo.
• 11/07. O alcalde reúnese en solitario co BNG para pedirlle que apoie o seu soldo de 41.000€ e que deixe sen el a Merche Noceda; a cambio o BNG podería incorporarse no futuro ao goberno. Rexeitamos esa proposta.
• 17/07. O PSOE anuncia na prensa que non ten acordo coa oposición e que se reincorporará ao seu posto de traballo.
• 19/07. O PSOE anuncia na prensa que xa ten un pacto co PP.
• 26/07. Pleno. O PSOE aproba o incremento dos salarios políticos grazas ao PP.