Quen é quen no novo goberno municipal de Carnota?

Ramón Noceda Caamaño

Lariño, 60 anos

Alcalde-presidente do Concello de Carnota. Ademais ocuparase das áreas de personal, finanzas, urbanismo e obras e servizos, ou agro, mar e monte, entre outras. Proxectos importantes da súa área serán a RPT, os orzamentos municipais 2015, o PXOM e o desenvolvemento das actuacións completas por lugares previstas no noso programa.

• Correo-e: alcaldia@carnota.gal

Iván Franco Caamaño

Carnota, 35 anos

Tenente de alcalde do Concello de Carnota. Levará as áreas de Turismo, Patrimonio, Medio Ambiente, Deportes e Comunicación e Novas tecnoloxías. Proxectos importantes da súa área serán as probas deportivas, a segunda fase de consolidación das estructuras do Castro de Mallou, a nova web municipal e o Víndemo Ver.

• Correo-e: ivan.franco@carnota.gal

Belén Campos Díaz

Caldebarcos, 48 anos

2ª tenente de alcalde do Concello de Carnota. Levará as áreas de Cultura e Normalización lingüística. Proxectos importantes da súa área serán a programación cultural do noso Concello ou a creación da Escola Municipal de Teatro.

• Correo-e: belen.campos@carnota.gal

Jorge Fiuza Barreiro

Sofán (Lira), 45 anos

3º tenente de alcalde do Concello de Carnota. Levará as áreas de Xustiza social e Promoción económica. Proxectos importantes da súa área serán o mantemento e mellora dos servizos sociais municipais, o banco municipal de alimentos, a posta en marcha do voluntariado coa xente maior e tamén do banco de leña para acabar coa pobreza enerxética da nosa veciñanza.

• Correo-e: jorge.fiuza@carnota.gal

Marupe Armendariz Villar

Canedo (San Mamede), 50 anos

Levará as áreas de Igualdade e diversidade, Memoria Histórica e Participación veciñal. Proxectos importantes da súa área serán a creación da Casa da Muller, a creación do Consello Local de Asociacións, o desenvolvemento dos orzamentos participativos e todas as políticas encamiñadas a lograr a igualdade efectiva e real entre homes e mulleres.

• Correo-e: marupe.armendariz@carnota.gal

Iago Maceiras Dosil

Lira, 23 anos

Levará a área de Mocidade e Promoción Xuvenil. Proxectos importantes da súa área serán a posta en marcha do Centro Xuvenil de Pedramarrada e o festival Arrincadeira destinado a potenciar os novos valores musicais do noso entorno.

• Correo-e: iago.maceiras@carnota.gal

RESOLUCIÓN DA ALCALDÍA

En Carnota, o 13 de xuño do 2015, o Sr. alcalde do Concello, D. Ramón Noceda Caamaño, dita a seguinte resolución:

Consonte o que dispoñen os artigos 21.2 e 3 e 23.1, 3 e 4 da Lei 7/1985, do 2 de abril, de bases de réxime local (en diante, LBRL), 61.2, 62 e 65 da Lei 5/1997, do 22 de xullo, de Administración Local de Galicia (en diante, LALG), e 43 e seguintes do Regulamento de organización e funcionamento das corporacións locais (en diante, ROF),

RESOLVO:

PRIMEIRO.- Nomeamento da Xunta de Goberno Local

Nomear como membros da Xunta de Goberno Local ós seguintes concelleiros:

• D. Iván Franco Caamaño
• Dª. Belén Campos Díaz
• D. Jorge Fiuza Barreiro

SEGUNDO.- Nomeamento de tenente de alcalde

Nomear tenentes de alcalde ós seguintes concelleiros pola orde que se sinala:

• Primeiro: D. Iván Franco Caamaño
• Segundo: Dª. Belén Campos Díaz
• Terceiro: D. Jorge Fiuza Barreiro

TERCEIRO.- Delegación de competencias na Xunta de Goberno Local

Delegar na Xunta de Goberno Local o exercicio das seguintes competencias da Alcaldía:

1. Autorización e disposición de gastos, e o recoñecemento de obrigacións que superen a contía de 6.000,00 €.
2. Aprobación de bases reguladoras de convocatorias, concesións e xustificación de subvencións a terceiros.
3. Aceptación de subvencións outorgadas a favor do Concello.
4. Aprobación de listas de contribuíntes de tributos e prezos públicos municipais, resolución de recursos contra os actos de xestión tributaria, e anulación de recibos; e a concesión de exencións do imposto municipal de vehículos de tracción mecánica.
5. Aprobar a oferta de emprego público con suxeición ó orzamento e ó cadro de persoal aprobados polo Pleno da Corporación, as bases das probas de selección do persoal funcionario e laboral, e das bases para a provisión de postos de traballo.  
6. O nomeamento do persoal funcionario e laboral, e o exercicio das potestades organizatoria e disciplinaria en materia de persoal, coas limitacións que sobre atribucións indelegables prevé a LBRL.
7. Aprobar os proxectos de obras e servizos que lle competan ó alcalde e cando lle corresponda a súa contratación de conformidade co que dispón o apartado seguinte.
8. A contratación de calquera clase de obras, xestión de servizos públicos, subministracións, consultoría e asistencia ou servizos, que lle competen ó alcalde, non sendo as que se tramiten como contratos menores ou en casos de urxencia.
9. A adquisición e o alleamento de bens e dereitos que lle corresponden ó alcalde e que teñan un valor superior a 3.000,00 €.
10. Aprobar os criterios e normas sobre a xestión dos servizos públicos, cando non lle correspondan ó Pleno.
11. Aproba-los instrumentos de planeamento que desenvolvan o plan xeral, os intrumentos de xestión urbanística e os proxectos de urbanización, cando non lle correspondan ó Pleno.
12. Outorgar as licenzas urbanísticas de obras e de actividades e coñecer das comunicacións previas nesas materias, e informar nos procedementos de construcións e instalacións en solo rústico.
13. A declaración de ruína dos inmobles, as ordes de execución de obras e as decisións sobre reposición da legalidade e sancionadoras en materia de disciplina urbanística, non sendo en casos de urxencia.
14. A resolución de toda clase de procedementos sancionadores que se tramiten por infraccións graves ou moi graves previstas nas ordenanzas municipais e, en xeral, no resto do ordenamento xurídico.
15. O outorgamento, autorización de transmisión e declaración de caducidade das licenzas de autotaxi.
16. O outorgamento de autorizacións para o uso ou aproveitamento especial e privativo do dominio público, cando non lle correspondan ao Pleno.
17. Os plans xerais de actuación das diversas áreas municipais e a programación temporal da súa execución, sen prexuízo das competencias que lle correspondan ó Pleno da Corporación.

CUARTO.- Nomeamento de concelleiros-delegados da Alcaldía

I. Delegacións xenéricas

Nomear concelleiros-delegados con facultades para dirixir e xestiona-los servizos correspondentes baixo a supervisión da Alcaldía, ós seguintes concelleiros:

• Concelleiro-delegado da área de Asuntos sociais e dependencia, coa denominación de Xustiza social, e da área de Promoción económica a D.Jorge Fiuza Barreiro.
• Concelleira-delegada da área de Cultura e da área de normalización lingüística a Dna. Mª Belén Campos Díaz.
• Concelleira-delegada das áreas de Igualdade e diversidade, Memoria Histórica e Participación veciñal a Dna Mª del Carmen Armendáriz Villar
• Concelleiro-delegado das áreas de Turismo, Patrimonio, Medio Ambiente, Deportes e Comunicación e novas tecnoloxías a D. Ivan Franco Caamaño.
• Concelleiro-delegado das áreas de Mocidade e Promoción Xuvenil a D. Santiago Maceiras Dosil.

II. Delegacións especiais

QUINTO.- Delegación de competencias no 1º tenente de alcalde, en caso de vacacións, ILT, ou delegación expresa.

Delegar no 1º tenente de alcalde, D.Iván Franco Caamaño, o exercicio das competencias de:

1. Contratación de obras, subministros e servizos que teñan un orzamento inferior a 6.000,00 €, e a autorización e disposición de gastos correspondentes.
2. Adquisición e alleamento de bens e dereitos competencia desta Alcaldía que teñan un valor inferior a 3.000,00 €.
3. Recoñecemento de obrigacións cando éstas teñan un importe inferior a 6.000,00 €, e as de importe superior cando deriven de contratos de carácter periódico e tracto sucesivo.
4. Ordenación de pagamentos derivados de obrigacións previamente recoñecidas e pagamentos por operacións extraorzamentarias, así como a sinatura de tódolos documentos contables.
5. Aprobación de liquidacións tributarias e demais actos de xestión e inspección tributaria, e o recoñecemento de dereitos en calquera das súas formas que non estean delegados expresamente na Xunta de Goberno Local, así como a resolución de recursos de reposición contra eles.
6. Devolución de ingresos por liquidacións tributarias, prezos públicos ou privados.
7. Aprobación de modificacións de créditos competencia da Alcaldía.
8. O desenvolvemento da xestión económica consonte ó orzamento aprobado pola Corporación e non expresamente atribuída a outros órganos.
9. As atribucións da Alcaldía en materia de persoal, agás as indelegables de xefatura superior de todo o persoal, separación de servizo de funcionarios e despedimento de persoal laboral, e das que son obxecto de delegación na Xunta de Goberno Local.

SEXTO.- Nomear como representantes dos Consellos de:

• CEIP Carnota: Jorge Fiuza Barreiro
• CEIP O Pindo: Mª Belén Campos Díaz
• IES Carnota: Iván Franco Caamaño
• Mancomunidade Serra do Barbanza: Iván Franco Caamaño
• Mancomunidade de Augas: Jorge Fiuza Barreiro

SÉTIMO.- Nomear para a comisión especial de Contas a: Belén Campos Díaz e a Jorge Fiuza Barreiro.

OITAVO.- Esta resolución publicarase no taboleiro de edictos e na páxina dixital da Corporación, e no Boletín Oficial da Provincia da Coruña.

O Alcalde

Asdo. Ramón Noceda Caamaño