Primitivo Pedrosa lembra que esta nova perda de servizos súmase á ausencia de pediatra, unha situación que leva arredor de dous anos obrigando as familias de Carnota a desprazarse até Muros para que as súas crianzas poidan ser atendidas por unha especialista.
A decisión da Consellaría de Sanidade de deixar sen servizo o centro médico os sábados pola mañá enmárcase nos cambios decididos polo Goberno galego para os Puntos de Atención Continuada, PAC, definidos nun “decretazo” que agrava a situación do sistema sanitario público.
Estas medidas implican cambios nos horarios de atención e o peche de centros de saúde que até o de agora abrían os sábados. No caso de Carnota, isto obrigará a moitas persoas usuarias a desprazarse a outros puntos asistenciais máis afastados dos seus domicilios, como o PAC de Muros.
“O Partido Popular recorta cada día máis os servizos públicos, como os da sanidade en Carnota; énchese a boca de dicir que apoian ao rural, pero a este paso imos quedar catro neste pobo, porque a xente marcha para onde hai servizos”, denunciou Primitivo Pedrosa.
O representante do BNG tamén criticou que o Concello non informase a veciñanza dos cambios na xestión sanitaria realizados polo Goberno galego. “É incomprensíbel que o goberno municipal non se preocupe por un servizo tan importante para os veciños e veciñas de Carnota”, insistiu.
Desde o BNG reclamamos á Xunta de Galiza que reverta estes recortes, recupere a atención sanitaria dos sábados pola mañá e restabeleza a pediatría no centro de saúde. Defender o rural é garantir servizos públicos, non obrigar a veciñanza a desprazarse cada vez máis lonxe para recibir atención básica.
Comentarios
Publicar un comentario