A organización nacionalista sinala que as contas do Goberno galego non incorporan novos servizos sanitarios no hospital comarcal, non prevén a construción de centros de día ou residencias públicas na Costa da Morte, non dan resposta suficiente aos recortes educativos nin inclúen unha aposta real pola vivenda pública ou polo asentamento de actividade industrial nos polígonos de Cee e Vimianzo.
O BNG critica tamén que a Xunta manteña a discriminación da Costa da Morte en materia de mobilidade. A comarca segue agardando polo remate da autovía e pola eliminación das peaxes da AG-55, mentres a Xunta anuncia partidas que, ano tras ano, non se traducen nun avance real das infraestruturas prometidas.
Para o BNG, esta situación agrava o despoboamento e a perda de oportunidades. A Costa da Morte precisa investimentos reais, servizos públicos dignos e unha política de equilibrio territorial que permita vivir e traballar na comarca en igualdade de condicións.
Desde Carnota, esta denuncia afecta directamente á nosa veciñanza. A falta de servizos sanitarios, educativos, sociais, de transporte e de infraestruturas comarcais condiciona tamén a vida diaria do noso concello.
Comentarios
Publicar un comentario