A mancha foi detectada na mañá do domingo 15 de outubro. A veciñanza alertou dunha gran mancha oleosa, firme, duns 0,5 km², situada pola zona de Punta Fornelo, mentres que nas rochas entre o Pindo e o Ézaro aparecía unha masa viscosa que tinguía de negro a costa. As persoas que deron o aviso sinalaban que lembraba ao chapapote do Prestige polo seu aspecto e pola súa textura extremadamente pringosa.
A costa apestaba ademais a gasoil, polo que a veciñanza valorou que podía tratarse dun sentinazo, é dicir, dunha limpeza ilegal dos tanques dunha embarcación no mar. Diante desta situación, alertouse ao 112, malia que inicialmente nin no Pindo nin no Concello de Dumbría tiñan novas da central de emerxencias.
Desde o 112 deuse aviso a Salvamento Marítimo, Gardacostas, Policía Local de Carnota, Garda Civil, GES de Muros, Protección Civil e autoridades medioambientais, para que se realizasen as investigacións correspondentes.
O noso litoral non pode seguir, 25 anos da maior catástrofe ecolóxica da nosa historia exposto a agresións ambientais sen resposta. Calquera vertido deste tipo debe investigarse, identificarse a súa orixe e depurarse responsabilidades. O mar é medio de vida, patrimonio natural e parte fundamental da identidade das nosas parroquias costeiras.
A veciñanza fixo o que correspondía: dar a voz de alarma e reclamar actuación. Agora correspóndelles ás administracións competentes aclarar a orixe do vertido, avaliar os danos e garantir que feitos así non queden impunes.
Nunca Máis!
Comentarios
Publicar un comentario