Pronunciamento do BNG de Carnota a respeito das ampliacións solicitadas pola empresa Stolt Sea Farm

Comunicado dos compañeiros do BNG no equipo de goberno, a instancias do alcalde Manolo García:

Ante as solicitudes cidadás de toma de posición ao BNG de Carnota e en particular aos nosos compañeiros no goberno no concello de Carnota no referente á posíbel ampliación das piscifactorías, queremos manifestar:

• O concello de Carnota atópase nunha preocupante situación de despoboamento por mor da escasa xeración de postos de emprego, o que da lugar a un fenómeno migratorio masivo, especialmente no sector poboacional xuvenil.
• Os membros nacionalistas na corporación municipal posiciónanse inequívocamente a favor da ampliación das plantas acuícolas localizadas no noso Concello, tal e como foi proposto pola xerencia da empresa Stolt Sea Farm S.A. radicada en Lira, co firme convencemento de que a xeración dos postos de traballo necesarios amortiguará a alarmante tendencia ao déficit poboacional do municipio.
• O BNG de Carnota e os seus representantes na corporación municipal velarán porque as ditas ampliacións sexan efectuadas dentro da legalidade proporcionada polos acordos aprobados nos órgaos nacionais competentes.
• O BNG apoiou abertamente a nivel nacional as ditas ampliacións, e particularmente mediante as figuras de Carlos Aymerich (portavoz do BNG no Parlamento de Galiza), Bieito Lobeira (Portavoz de pesca) e Pablo González Mariñas, que xa presentaron diversas iniciativas no Parlamento galego para facilitar e axilizar a tramitación dos expedientes.
• Nin o BNG de Carnota nin o propio Concello teñen competencia algunha na aprobación da ampliación das factorías acuícolas (asunto unicamente concernente á Consellería de Pesca da Xunta de Galiza).
• Nin o BNG de Carnota nin o Concello teñen competencia algunha para influir nos prezos ou na fórmula de adquisición das parcelas afectadas polas posíbeis ampliacións (asunto unicamente concernente á Consellería de Política Territorial da Xunta de Galiza). Os veciños deben saber que de existir diferencias neste punto, o órgao mediador competente ao que deben acudir é o Tribunal de Xustiprezo.

Pola nosa parte, consideramos o tema zanxado, á espera da pertinente resolución da Xunta de Galiza ao respecto.